Përcaktimi

Tumoret që evidentohen në kocka mund të jenë:

• Tumore që e kanë origjinën në vetë kockën
• Tumore që e kanë origjinën në palcën e kockave (psh. Leuçemitë)
• Metastazat kockore (përhapja e një tumori malinj të një organi tjetër në organe të tjera në distancë, ndër të cilat edhe në kocka).

Kanceri i kockave, pra tumori malinj që zhvillohet në kocka, shfaqet relativisht rrallë (në 1-5 raste në 100.000 persona). Diagnostikimi i vonshëm i tij shoqërohet shpesh nga një ecuri jo e favorshme.

Shkaqet

Tumoret që zhvillohen në vetë kockën (tumoret kockore parësore)

Format më të përhapura të tumoreve kockore parësore janë: osteosarkoma (sarkoma kockore), kondrosarkoma dhe sarkoma Eving.

• Osteosarkoma dhe sarkoma Eving përfaqësojnë një shtim të qelizave kockore, ndërkohë që kondrosarkoma është një shkatërrim i qelizave kërcore. Sarkoma Eving është tumori kockor më i shpeshtë tek fëmijët. Tumoret malinje të kockave shfaqen shpesh në nivelin e gjymtyrëve të poshtme. Shkaku i tyre mbetet ende i paqartë. Personat e prekur nga sëmundja e Pexhet (sëmundje kockore, me shumë gjasa e shkaktuar nga një virus dhe që çon në rritje kockore jonormale dhe keqformime) shfaqin një shkallë më të lartë të rrezikut për të zhvilluar osteosarkomë. Tumori beninj i kërcit kockor tepër rrallë mund të japë kondrosarkomë. Tumoret e kockave, si çdo tumor tjetër, mund të përhapen në organe të tjera, veçanërisht në mushkëri.

Tumoret që e kanë origjinën në palcën e kockave

Kanceret e gjakut dhe nyjeve limfatike shkaktojnë shumëzim qelizor në nivelin e palcës kockore. Forma më e shpeshtë e tyre janë ato që shkatërrojnë qelizat e sistemit mbrojtës të organizmit, ku përfshihet plazmocitoma ose mieloma e shumëfishtë.

Metastazat kockore (metastazat e skeletit)

Në këtë rast, tumori parësor gjendet në një organ tjetër dhe, nëpërmjet qarkullimit të gjakut, ka lëshuar metastaza në organet e tjera në distancë, ndër të cilat edhe në kocka. Përgjithësisht, bëhet fjalë për kancerin e gjirit, kancerin e prostatës, kancerin e mushkërisë ose kancerin e gjendrës tiroide.

Simptomat

• Dhimbje kockore të përhapura
• Fryrje lokale (në zonën e tumorit), ndonjëherë zmadhim i nyjeve limfatike
• Shenjat e inflamacionit (skuqje, enjtje, nxehtësi lokale)
• Rënie në peshë
• Ulje e rendimentit fizik dhe mendor
• Thyerje spontane ose pas një lëndimi minimal të kockave
• Paraliza të mundshme, në rast se tumori është shtrirë në indet përreth.

Diagnoza

Diagnoza e kancerit të kockës përcaktohet duke u bazuar në:

• Simptomat e pacientit dhe historinë e fillimit të tyre
• Egzaminimin trupor të imtësishëm
• Analizat e gjakut
• Egzaminimin radiografik
• Egzaminimin ekografik
• Skaneri ose rezonanca magnetike
• Shintigrafia e kockave
• Angiografia
• Biopsia

Trajtimi

Trajtimi i metastazave kockore, kancereve të gjakut dhe të sistemit limfatik bëhet në varësi të sëmundjes kryesore.

• Osteosarkoma: Kimioterapi agresive, operacion kirurgjikal për të hequr masën tumorale.
• Kondrosarkoma: Trajtimi kryesor është ai kirurgjikal.
• Sarkoma e Eving: Radioterapi, kimioterapi dhe operacion kirurgjikal.

Ndërlikimet e mundshme

Në rastin e metastazave kockore, ecuria varet nga stadi i zhvillimit të tumorit parësor.

• Kur tumori zhvillohet në nivelin e indeve përreth, ai mund të shkaktojë paraliza dhe dhimbje të forta.
• Thyerjet kockore patologjike

Ndërlikimet e lidhura me operacionin:

• Infeksionet
• Gjakderdhjet
• Dëmtimet e nervave
• Prerja e gjymtyrës së prekur
• Trombozat dhe embolitë